பெண்மையின் சக்திவாய்ந்த சிம்பொனி

தன்னை அரசவைக்கு அழைத்துச்செல்ல வந்த துச்சாதனனிடம் பாஞ்சாலி, தான் மாதவிலக்குக் காரணமாக, ஒற்றையாடை உடுத்தியிருப்பதால், அரசவைக்கு வரவியலாது, என்று கூறுவாள். 

இந்தச் சம்பவம் பண்டைய சமூகங்களில் நிலவிய பாலின அதிகார இயக்கவியல் மற்றும் ஆணாதிக்க நெறிமுறைகளை எடுத்துக்காட்டுகிறது.  திரௌபதியின் மாதவிடாய், அவளை இழிவுபடுத்துவதற்கும், அவமானப்படுத்துவதற்கும் ஒரு கருவியாகப் பயன்படுத்தப்பட்டது. 

இது சமூகத் தடைகளை வலுப்படுத்தி, மாதவிடாய் என்பது பெண்களுக்குச் செயலற்ற தன்மையை ஏற்படுத்துமாறு அமைத்தது. 

மாதவிடாய்க்குப் பொதுவாகப் பயன்படுத்தப்படும் சொற்றொடர், அவள் “வெளியே உட்கார்ந்திருந்தாள்”. 

இந்தச் சொற்றொடரை நான் முன்பு, என் அம்மாவின்  வீட்டில் கேட்டிருக்கிறேன்.  எல்லா மரபுவழிக் குடும்பங்களிலும்  

பெண்கள்  அவர்களின் மாதவிடாய்க் காலத்தின் மூன்று நாட்களும் வெளியே உட்கார வேண்டும்.  இந்த நடைமுறை, பாரம்பரிய நம்பிக்கைகள் மற்றும் கட்டுக்கதைகளில் வேரூன்றியுள்ளது. மாதவிடாயைத் தூய்மையற்ற, அசுத்தமான மற்றும் எதிர்மறையான அர்த்தங்களுடன் தொடர்பு படுத்தியிருந்தனர்.

மாதவிடாய்ச் சுழற்சி, பெரும்பாலும் தவறாகப் புரிந்து கொள்ளப்பட்டு, இரகசியமாக மறைக்கப்படுகிறது. பெண்கள் பருவமடையும் போது தொடங்கி, சில வருடங்கள் வரை தொடரும் உயிரியல் செயல்முறையே இந்த மாதவிடாய். இது அங்கீகாரம் மற்றும் பாராட்டுக்குத் தகுதியானது. ஒரு தடை செய்யப்பட்ட விஷயமாக இல்லாமல், மாதவிடாய் என்பது ஒரு சுழற்சியின் சக்தியாக, அதன் முக்கியத்துவத்தை வெளிச்சம் போட்டுக் காட்ட வேண்டிய நேரம் இது.

சில சமூகங்களில், மாதவிடாய்க் காலங்களில் பெண்கள் சில நடவடிக்கைகளில் பங்கேற்பதையோ, மத விழாக்களில் கலந்து கொள்வதையோ, குறிப்பிட்ட இடங்களுக்குச் செல்வதையோ தவிர்க்குமாறு கேட்டுக் கொள்ளப்படுகிறார்கள்.  இந்தப் புறக்கணிப்பு பெண்களிடையே அவமானம், சங்கடம் மற்றும் பாகுபாடு போன்ற உணர்வுகளுக்கு வழிவகுக்கும். அத்துடன், மாதவிடாய்க் குறித்த எதிர்மறையான மற்றும் தீங்கு விளைவிக்கும் அணுகுமுறையை நிலைநிறுத்தும்.

இந்த கட்டுரையில், மாதவிடாய் பற்றிய அம்சங்களை ஆராய்வோம். மறைந்திருக்கும் வலிமையைக் கண்டறியவும் இந்த இயற்கை நிகழ்வின் அழகைத் தெரிந்து கொள்ளத் தயாராகுங்கள்!

மாதவிடாய் என்பது, கர்ப்பத்திற்கு உடலைத் தயார்ப்படுத்தும் மாதாந்திர சுழற்சி முறை. சராசரியாக, மாதவிடாய்ச் சுழற்சி சுமார் 28 நாட்கள் நீடிக்கும். ஆனால் அது நபருக்கு நபர் மாறுபடும். ஒவ்வொரு மாதமும் கர்ப்பம் தரிக்க, உடலில் உள்ள கருப்பை, தன் சுவரை ரத்தத் திசுக்களால் பலப்படுத்தித் தயார் செய்து கொள்ளும். கருத்தரித்தல் ஏற்பட்டால், மாதவிடாய் ஏற்படாது. கர்ப்பம் ஏற்படவில்லை என்றால், மாதவிடாய் மூலம் கருப்பைப் புறணி வெளியேறுகிறது. அதன் பின் சுழற்சி மீண்டும் தொடங்குகிறது. 

அடுத்தத் தலைமுறையினரைப் பெற்று வளர்க்கும் பொறுப்பு பெண்ணுக்கு உண்டு. ஆம்.. கரு முட்டையைப் பெற்று, அதைத் தனக்குள் வளர்க்கும் பொறுப்பும் பெருமையும்  பெண்களுக்கு உண்டு. அடுத்த தலைமுறையை உருவாக்க, கர்ப்பம் தரிக்கக் கருப்பைக்குச் சுவர் போல பாதுகாப்பாக உள்ள இரத்தத் திசுக்கள் மாதவிடாயாக வெளியேறும்போது, பெண்களுக்கு, உடலில் அசௌகரியம் ஏற்படலாம்… உணர்ச்சி மாற்றங்களை அனுபவிக்கலாம். பெண்ணுக்குத் தாய்மை வளம் தரக்கூடிய அம்சமாக, தாய்மைக்குத்  துணை நிற்கும் விதமாக இருக்கக்கூடியது, இந்த இரத்தத் திசுக்கள் தான். தாய்மையைப் போற்றும் இந்தச் சமூகம், ஏன் மாதவிடாயை அசௌகரியமாகவும், வெறுத்து ஒதுக்க வேண்டியதாகவும் கருத வேண்டும்? இது இல்லையேல், தாய்மை இல்லை. 

இதைப் புரிந்து கொண்டு, ஒவ்வொரு மனிதனும்  நினைவில் கொள்ள வேண்டிய கருத்துகள்…

⁃ மாதவிடாய் சுழற்சி என்பது குறிப்பிட்ட வயதிற்கு மேல் பெண்களில் ஏற்படும் இயற்கையான செயல்முறையாகும்.  

⁃ முதல் மாதவிடாய் காலகட்டத்தை சந்திக்கும் சிறுமிகள் சந்தோஷத்துடனோ, பயத்துடனோ அல்லது கவலையுடனோ எதிர்கொள்ளலாம். 

⁃ ஒவ்வொரு பெண்ணுக்கும், இது பெண்மைக்கான முக்கியமான மாற்றத்தைக் குறிக்கிறது. குடும்பம் மற்றும் நண்பர்களின் ஆதரவு நிச்சயம் தேவை.  

⁃ முதல் மாதவிடாய்க்கு முன், பெண் குழந்தைகளுக்கு, மாதவிடாய்க் குறித்த, புரிதலை ஏற்படுத்த வேண்டும். இது அவர்களின் நம்பிக்கையை வளர்க்கிறது.  

⁃ ஆண் பிள்ளைகளுக்கும் இதைப்பற்றியத் தெளிவு இருப்பது நல்லது. இது சமூக ஒற்றுமைக்கு பங்களித்து ஆரோக்கியமான பழக்கங்களை ஊக்குவிக்கிறது. அத்தகைய தகவல்கள் வீட்டிலும் பள்ளியிலும் வழங்கப்பட வேண்டும். 

⁃ மாதவிடாயில் சுகாதாரமும் கண்ணியமும் இன்றியமையாத மனித உரிமைகளாகக் கருதப்படவேண்டும்.

⁃ சுத்தமான தண்ணீரும், தரமான மாதவிடாய்ப் பொருட்களும், இன்றியமையாததாகும். இதில் கவனக் குறைவு ஏற்பட்டால், உடல் ஆரோக்கியம் பாதிக்கப்படும்.

⁃ மாற்றுத்திறனாளிகள், சிறப்புத் தேவைகள் உள்ள சிறுமிகள் மற்றும் பெண்கள், மாதவிடாய்ச் சுகாதாரம் தொடர்பான கூடுதல் சவால்களை எதிர்கொள்கின்றனர். அவர்களின் மாதவிடாயை எதிர்கொள்ளத் தண்ணீர் வசதி கொண்ட கழிவறைகள் மற்றும் அவை சார்ந்த பொருட்கள் இல்லாததால் பாதிக்கப்படுகின்றனர்.

⁃ இயற்கைப் பேரழிவுகள், போர் போன்ற அவசர காலங்களில், UNICEF நிறுவனம் பெண்கள் மற்றும் சிறுமிகளுக்கு அத்தியாவசிய சுகாதாரக் கருவிகளை வழங்குகிறது, இதில் சானிட்டரி பேட்கள், கழிவறையைப் பயன்படுத்தும் போது தனிப்பட்ட பாதுகாப்பிற்காக ஒரு ஒளிரும் விளக்கு மற்றும் விசில் ஆகியவை அடங்கும்.

⁃ குறைந்த வருமானம் உள்ள நாடுகளின் பள்ளிகளில் போதுமான குடிநீர், சுகாதாரம் மற்றும் கழிவறை வசதிகள் இல்லை. இது ஒரு அசௌகரியமான அனுபவத்தை அவர்களுக்கு ஏற்படுத்தும்.  இதனால் இக் காலத்தின்போது ஆசிரியைகளும் மாணவிகளும் பள்ளியைத் தவிர்க்க முடிவெடுப்பார்கள். 

ஆண்கள் இதைப் பார்க்கும் கண்ணோட்டத்தைப் பற்றிப் பேசுவதை விட, பெண்களே இன்று எவ்வாறு புரிந்து கொண்டு செயல்படுகிறார்கள், என்பதை நாம் ஆராய வேண்டும். 

⁃ வசதி வாய்ப்புள்ள பெண்கள் சிலர் இக்காலகட்டத்தை வெறுப்பதுண்டு. தவிர்க்க இயலாத ஆரோக்கியமான இந்த நிகழ்வை, வசதிக் குறைவான மற்றும்  பல இன்னல்கள் நிறைந்த பகுதிகளில் வாழும் பெண்கள் இதைத் திறமையுடன் சமாளிக்கும் தன்மையைப் பார்த்து நாம் அவர்களிடமிருந்து கற்றுக் கொள்ள வேண்டும். 

⁃ மாதவிடாய்ச் சுழற்சி என்பது ஹார்மோன் ஏற்ற இறக்கங்கள் மற்றும் உடல் மாற்றங்களை உள்ளடக்கியது. 

⁃ பெண்கள் இக்காலகட்டத்தில் தன்னைப் பாதுகாத்து, தனக்கான முன்னுரிமை அளிப்பது மிக அவசியம். நம் உடலுடனும் உணர்ச்சிகளுடனும் இணைந்திருக்க இந்த மாதவிடாய்ச் சுழற்சி ஒரு நினைவூட்டலாக செயல்படுகிறது. 

⁃ ஒருவரின் மாதவிடாயை, இயற்கையான மற்றும் இயல்பான உடல் செயல்பாடு என்று அங்கீகரிப்பதும், அதை வெறுக்காமல்  ஏற்றுக்கொள்வதும் தான், அதன் ஆற்றலைப் பெறுவதற்கான முதல் படியாகும். 

⁃ உடலியல் மாற்றங்கள், ஹார்மோன் ஏற்ற இறக்கங்கள் மற்றும் சுழற்சியின் வெவ்வேறு கட்டங்களைப் பற்றிக் கற்றுக்கொள்ளும் போது, பெண்கள் தங்கள் மாதவிடாய்ப் பயணத்தை தெளிவுடனும்  நம்பிக்கையுடனும் கடந்து செல்ல அனுமதிக்கிறது.

⁃ நம் உணர்ச்சித் தூண்டுதல்களை அடையாளம் கண்டுகொள்வதுடன், அவற்றைக் கட்டுப்படுத்திச் சமநிலையுடன் வாழ்வதற்கான உத்திகளைக் கற்றுக்கொள்ள வேண்டும். 

⁃ இதை வலியுறுத்தித் தான் மூன்று நாட்களுக்கான ஓய்வு என்று நாம் மனதில் கொள்ள வேண்டியது. மெல்லிய உடற்பயிற்சி, புத்தக வாசிப்பு, பூங்காவில் நடை பயிற்சி, தியானம், மனதிற்கு இதமான பாடல்களைக் கேட்பது, வெது வெதுப்பான தண்ணீரில் குளியல், கிரீன்-டீ அருந்துவது, அதிக தண்ணீர் குடிப்பது, யோகா,  போன்றவை புத்துணர்ச்சி அளிக்கும். 

⁃ சத்தான ஆகாரங்களை உட்கொள்ள வேண்டும். கொழுப்பு நிறைந்த, மசாலா, கார வகைகளை இக்காலகட்டத்தில் தவிர்ப்பது நல்லது. 

⁃ முக்கியமாக, மலச்சிக்கல் இல்லாமல் பார்த்துக்கொள்ள வேண்டும்.

மாதவிடாய்க் காலத்தில் கடல் அலைகள் போல் ஹார்மோன்கள் அலைந்து திரிகின்றன. இதனால் மகிழ்ச்சி, சோகம், சில சமயங்களில் கோபம் கூட ஏற்படும்.  ஈஸ்ட்ரோஜனின் அலை உயர்ந்து ஓயும் போது, ​​நாம் நம்பிக்கை மற்றும் உத்வேகத்தை அனுபவிக்கலாம். அடுத்த நொடி, சுய சந்தேகத்தில் மூழ்கலாம். மாதவிடாயின் உணர்ச்சிகரமான சூறாவளியின் மத்தியில், ஒவ்வொரு பெண்ணும் தனது உண்மையான வலிமையைக் கண்டறிகிறாள். மாதவிடாய் நம் வரம்புகளை ஒப்புக்கொள்ளவும், நம்மைப் பார்த்துக் கொள்ளவும், தேவைப்படும்போது ஆதரவை அடையவும் நம்மை ஊக்குவிக்கிறது.  பாதிப்பு என்பது ஒரு பலவீனம் அல்ல என்பதை இது நமக்கு நினைவூட்டுகிறது. நம்மை உணர்த்தும் நமக்கான கண்ணாடி போல விளங்குகிறது. 

நம் உடலை கவனிக்கும் போது, நமது உள்ளுணர்வு மேம்படும். இந்த உள்ளுணர்வுகளைச் சரியாக உணரவும், எதிரொலிக்கவும், முடிவுகளை எடுக்கவும்  நமக்கு வழிகாட்டும். இனி நம் பயணத்தில், மாதவிடாயின் கதையை மாற்றி எழுதும் தைரியத்தை வரவழைத்துக் கொள்வோம். அதை ஒரு ‘விலக்கி வைக்க வேண்டிய’ விஷயமாக இல்லாமல், பெண்மையின் சக்திவாய்ந்த சிம்பொனியாக மாற்ற வேண்டும். மாதவிடாயின் உணர்வுப்பூர்வமான சிம்பொனியைக் கேட்போம், ஒவ்வொரு குறிப்பையும் மென்மையுடனும் இரக்கத்துடனும் தழுவிக்கொள்வோம்.  மாதவிடாய் என்பது ஒரு சுமையாக இல்லாமல், பெண்களாகிய நமது உள்ளார்ந்த வலிமையை மகிழ்ச்சியுடன் கொண்டாடும் ஒரு உலகத்தை, ஒன்றாக உருவாக்குவோம்.
இறுதியாக, மாதவிடாய் என்பது, பெரும்பாலும் பெண்மையுடன் தொடர்புடையதாக இருந்தாலும், அனைத்துப் பெண்களுக்கும் மாதவிடாய் இல்லை என்பதைக் கவனத்தில் கொள்ள வேண்டும்.  பாலின அடையாளம் வேறுபட்டது மற்றும் பரந்த அளவிலான அனுபவங்களும் வெளிப்பாடுகளையும் உள்ளடக்கியது.  தனிமனித அடையாளம் மற்றும் சுய வரையறையின் பின்னணியில் மாதவிடாய் புரிந்து கொள்ளப்பட வேண்டும்.